අපිට අපි නැති වීම

විසිඑක් වන සියවසේ නවමු ප්‍රවණතාවය වන්නේ ගෝලීයකරණයයි. තවත් ලෙසකින් එය අර්ථ ලන්වන්නේ නම් ලෝකය එකම ආර්ථික හා සමාජීය රටාවකට එකමුතු වීම ගෝලීයකරණයයි. මෑතක් වන තුරුම කතා බහට ලක් වූ කාරණයක් වන්නේ විශ්ව ගම්මාන සංකල්පයයි. නමුත් අද වන විට එය විශ්ව පවුල දක්වා ගමන් කර ඇත. ගෝලීයකරණය ආන්දෝලනාත්මක විෂයක් වී ඇත්තේ මේ යටතේ එකම ආර්ථික රටාවක්, එකම සංස්කෘතියක ක්‍රියාදාමයක්, එකම ඇදහිලි පද්ධතියක් මේ යටතේ බිහිවෙමින් පවතින නිසාය.

ලෝකය මෑතක දී සිට අදහාගත නොහැකි තරමින් සංකෝචනය වෙමින් පවතී. අන්තර්ජාලය ලෝකය කුඩා කර ඇත. නවීන සන්නිවේදන හා තාක්ෂණික මෙවලම් ඇසුරින් ලොව රටවල් අතර පවත්නා දුරස් බව ක්‍රමයෙන් අඩුකර ඇත. අත දිගු කළ සැනින් ලෝකයේ ඒනෑම තැනක් හා සම්බන්ධ විය හැකිය. පෙර කී ලෙස විශ්ව ගම්මානය විශ්ව පවුලක් බවට පත් වූයේ මේ අනුවය.

සංවාත ආර්ථිකයක් ඇති රටවල් පවා පෙර නොවූ විරෑ ලෙස අන්තර් සම්බන්ධතා පවත්වයි. ඇමතුමක් මගින් ලොව ඈත කෙළවරක අයෙකු හා සම්බන්ධ විය හැකිය. එය කෙතරම් දියුනු තත්ත්වයකට පත්ව ඇත්ද කිවහොත් වෙනත් රටක ඇති භාණ්ඩයක් ගෙන්වා ගැනීමට පමණක් නොව වෛද්‍ය ප්‍රතිකාර පවා ලබා ගැනිමට හැකිය. ලෝකයම විසිත්ත කාමරයකට කොටු කර ඇත්තා සේය. ඉංග්‍රිසි භාෂාව හා නව තාක්ෂණික මෙවලම් පරිහරණයේ හැකියාව ඇති කාට වුවද නව තාක්ෂණයේ අනුහසින් මුලු ලෝකය තමා අසලින් මැවිය හැකිය.

අන්තර්ජාලය මගින් ලොවම ස්පර්ෂ කරන අතර ඉංග්‍රීසි භාෂාව පමණක් නොව ඉංග්‍රීසි සංස්කාතිය ද දුබල රටවල් කෙරෙහි බලපෑම් කෙරෙනු දැකිය හැකිය. බලවත් රටවල් සිය සංස්කෘතිකාංග වෙනත් රටවලට ව්‍යාප්ත කරන්නේ වඩා කැමැත්තෙනි. ඇමරිකානු සංස්කෘතික අධිරාජයයක් ලෙව පුරා වයාප්ත වීම ඉතා වේගයෙන් සිදු වේ. හොලිවුඩ් සිනමාව, කව්බෝයි චිත්‍රපට සම්ප්‍රදාය, පොප් සංගීතය දැනටමත් ලොව බොහෝ රටවල් ආක්‍රමණය කර හමාරය.

මානව වර්ගයාගේ සුව පහසුව උදෙසා මානව පරිශ්‍රමයෙහි ප්‍රතිඵල බෙදා හදා ගත යුතුයි. එහෙත් එය රටක අනන්‍යතාවය කෙරෙහි බලපෑම් කරන්නේ නම් ඒ ඉදිරියේ මුනිවත රැකිම බලවත් වරදකි. ගෝලියකරණයේ සාධනීය පක්ෂණ සැබවින්ම අප අලය කළ යුතුය. එහෙත් එයින් යම් සංස්කෘතික පසුබිමකට අනර්ථකාරී ක්‍රියාවක් සිදු වන්නේ නම් එය වහාම වැළැක්විය යුතුය.