වීදියේ මිලින වන මල් කැකුළු
අනාගත ලෝකයේ භාරකරුවන් වන ළමුන්ට ඔවුන්ගේ සොඳුරු ළමා කාලය සුරක්ෂිතව හා ඵලදායී ලෙස ගත කිරීමට මෙන්ම ඔවුන් කායිකව හා මානසිකව සමෘද්ධිමත් කිරීම පිණිස ඔවුන්ගේ අයිතිවාසිකම් ආරක්ෂා විය යුතුය. නමුත් වර්තමාන සමාජය දෙස බැලූ විට දැකිය හැකි බරපතළ සමාජ ඛේදවාචකයක් වන්නේ ළමා අයිතිවාසිකම් අමු අමුවේ කඩ වීම්ය. ඒ වෙනුවෙන් කෙතරම් නීති අණ පනත්, සම්මුතීන් පැවතියත් මේ ඛේදාන්තයේ සීඝ‍්‍ර වර්ධනයක් මිස අවම වීමක් සිදුවන බවක් නම් දැකිය නොහැකිය. එහිදී සිය පවුල තුළින් මෙන්ම පවුල් පරිසරයෙන් එපිටදීත් ළමයාගේ අයිතිවාසිකම් උල්ලංඝනය වීම් හා ළමයාගේ ගරුත්වය විනාශ කෙරෙන ක‍්‍රියා සිදු වන බව දැකගත හැකිය. මහමග වෙසෙන වීදී දරුවන් හෙවත් මත්වාසී දරුවන්ගේ තත්ත්වය මෙහි ලා ඉතා බැ?රුම් වන්නේ සමාජය තුළ ඔවුන් පත්ව ඇති අනාරක්ෂිත තත්ත්වය නිසාය.
දරුවෙකු වීදි දරුවෙකු බවට පත් වන්නේ ඒ දරුවාගේ වරදක් නිසා නොව සමාජයේ පවතින යම් වරදක් නිසාය. මන්ද ඔවුන්ද මෙලොවට උපත ලබන්නේ වීදී දරුවෙකු ලෙස නොව සාමාන්‍ය දරුවෙකු ලෙසය. මෙරට පවත්නා සමාජ ආර්ථික මූලයන් මේ සඳහා බලපානු ඇත. ලංකාවේ ග‍්‍රාමීය ආර්ථිකය කඩා වැටීම, කේන්ද්‍රීය පවුල බිඳ වැටීම වීදි දරුවන් බිහිවීමට මූලික හේතු ලෙස දැක්විය හැකි අතර ඊට අමතරව කුටුම්භය තුළ දරුවාව නොසළකා හැර දැමීම, දෙමාපියන් මත්පැන්වලට සහ මත්ද්‍රව්‍යවලට ඇබ්බැහි වීම හේතුවෙන් නිවස හිංසාකාරී තත්වයකට පත් වීම නිසා යනාදී කාරණා ප‍්‍රමුඛ කරගෙන ද තම නිවහන අතහැර මාවත නිවහන කර ගත් ළමුන්ද මේ අතර සිටින බවට සමීක්ෂණ වාර්තා සාක්ෂ්‍ය දරනු ඇත. කාරණා කෙසේ වෙතත් ස්වභාවික විපත් නිසා හෝ යුද්ධය වැනි හේතූන් නිසා තම දෙමාපිය නෑ හිතවතුන් අහිමි වූ දරුවන් ද මේ අතර සිටින බව දැකගත හැකිය.
දරිද්‍රතාවය යන්න දරුවෙකු, වීදි දරුවෙකු බවට පත් කිරීමට හේතු වන ප‍්‍රමුඛ කාරණාවකි. එහිදී දරිද්‍රතාවයෙන් පෙළෙන දෙමාපියන් ධනය උපයා ගැනීමේ අයථා හස්තයක් ලෙස දරුවන් භාවිතා කරන්නා සේම දරුවන්ද තම අවශ්‍යතාවන් සපුරා ගැනීමේ මග මෙය ලෙස සළකා එම ජීවිතයට ඇබබැහි වීමක් ද සිදු වනු ඇත. මීට අමතරව නිසි වයසේදී දරුවාට පවුල තුළින් දෙමාපියන්ගෙන් ලැබිය යුතු ආරක්ෂාව, සෙනෙහස, ආදරය, රැුකවරණය වැනි සංවේදී මානුෂීය කාරණා අහිමිවීම හරහා දරුවන් හුදකලා තත්ත්වයකට පත්වීම නිතැනින් සිදු වේ. මේ බැඳීමේදී මවගේ වගකීම ප‍්‍රබල වන අතර මව පවුල අත හැර යාම, විදේශ ගත වීම මෙන්ම දෙමාපියන් අනියම් සබඳතාවල පැටලීම වැනි දේවල් හරහා දරුවන් වීදි දරුවෙකු ලෙස සමාජගත වීමේ ප‍්‍රවණතාවක් දැකගත හැකිය.
වීදි දරුවන් පිළිබඳ ප‍්‍රශ්නය ලංකාවේ පමණක් නොව ලෝකයේ පවා සමාජ ප‍්‍රශ්නයක් බවට වර්තමානය වන විට පරිණාමය වෙමින් පවතී. ලංකාව පිළිබඳව සළකා බැලීමේදී පෙනී යන්නේ අද්‍යතනය වන විට කොළඹ පමණක් නොව දුරබැහැර ප‍්‍රදේශවල පවා මෙම ප‍්‍රශ්නය ව්‍යාප්ත වෙමින් පවතින බවකි. මෙම ගැටලූවේ අඳුරු ඛේදාන්තය වන්නේ මේ අනාරක්ෂිත දරුවන් විවිධ අපචාර හා අපරාධයන්ට ගොදුරු විය හැකි, නතු කර ගත හැකි ඉඩකඩ බෙහෙවින්ම වැඩි වීමයි. මේ දරුවන් බොහෝ දෙනෙකු මත් පැන්, නීති විරෝධී මත් ද්‍රව්‍ය වෙළඳාම, සොරකම් කිරීම, සම ලිංගික චර්යාවන්, ගණිකා වෘත්තිය ආදී සමාජ විරෝධී කටයුතු සඳහා පොළඹවා ගැනීම් හෝ ඇබ්බැහිවීම් සිදුවීමේ සම්භාවිතාවය ඉහළ අගයක් ගනු ලබයි. ඒ හරහා ළමා වියේ සුන්දරත්වය වෙනුවට තම වයසට ඔරොත්තු නොදෙන අන්දමේ වැඩිහිටියෙකු විසින් අත්දකින අද්දැකීම්වලට යටත් වීමට මෙම දරුවන්ට සිදුවනු ඇත. ඒ තුළින් විවිධ මානසික සංකූලතාවන්ට දරුවා මුහුණ දෙන අතර එය සෘජුව දරුවාගේ පෞරුෂ සංවර්ධනයට බලපානු ලබයි.
එසේම වර්තමානයේදී සි`ගමන් යැදීම තුළ දරුවා අත්‍යාවශ්‍ය වලමක් වී ඇත. වීදි දරුවන් පිළිබඳව කතා කරන විට ඔවුන් සිය යැපීම් මාර්ගය ලෙෂ තෝරා ගෙන ඇත්තේග සි`ගමන් යැදීමයි. වැඩිහිටියෙතුට සාපේක්ෂව දරුවෙකු සිඟමන් යැදීම තුළ අනුකම්පාව ලැබීමේ ප‍්‍රවණතාව ඉහළ අගයක් ගන්නා නිසා වීදිය තුළ යාචක වෘත්තිය සඳහා දරුවා මෙලෙස අත්‍යවශ්‍ය මෙවලමක් බවට පත්ව තිබේ. මෙම දරුවන්ගේ සමාජයානුයෝජනය ක‍්‍රියාවලිය සිදුවන්නේ මෙවන් වාතාවරණයක් යටතේය.
වීදි දරුවෙකු වේවා සාමාන්‍ය දරුවෙකු වේවා ළමයා ළමයාමය. එහි කිසිඳු තර්කයක් නැත. ඔවුන් රටක අනාගත පරම්පරාවයි. නමුත් යම් දවසක රටේ සමාජ ආර්ථික සංවර්ධනයට සක‍්‍රීයව දායක විය හැක්කේ යහපත් ළමා කාලයක් ඔවුන්ට හිමි වුවහොත් පමණි. ඒ නිසා වීදි දරුවන්ගේ ප‍්‍රශ්නයෙන් පැන යාමට කිසිවෙකුට හැකියාවක් නොමැත. ඔවුන්ට ද සු්න්දර ළමා කාලයක් උරුම කර දීම කාගේත් යුතුකමකි.
දනුෂි ජයවර්ධන
දනුෂි ජයවර්ධන
No comments:
Post a Comment